Noch via Dog Rambazamba in da Grossstod haumma se scho gscheit gfreit auf a boa gmiadliche Dog in und um Krabi aun da Westküstn vo Thailaund. Flug bucht, Quatier a, a feins Weda bstöd und daun is scho dahigaunga.

Krabi hod uns mit dem Weda dawoat, des ma scho aus Bangkok kennt haum. Jawoi! Hoas, Sun und am Obnd a gscheida Schledara oda a Weda. Ideal via Dogesduan und Ausflüg. A kulinarisch haum mia drei Vegetarier – jetzt jo vasteakt mit an beruflichn Kulinarika – de thailändische Küch gauns sche durchprowiad. Obst und Gmias, Fruchtscheks, Palatschinkn und ollalei Siaß, Schoafs, Siaß-Saus und Pikants.

Tjo, und wias so kummt haumma natürli den ansa Rodschlog vo da Korner-Oma (und vo fü aundare Asien-Obenteira) net gaunz befoigt: Bauchzwicka, Mognweh, zfü gessn -> a zwa drei Schnapsal tringa! Und zwo reichli, nix Unsauwas, sondan Kloare und Stoake.

Jo und so is daun soweit kumma, das nua de zwa Kornabuam de wüde Sim-Insl-Longtelbod-Tour mit suppa Feiascho bucht haum und de Elisa in da Zwischenzeit vollklimatisiert a Pause vo de zwa Rotzbuam khobt hot. S’Inslhopping woa fein und jedn Bath weat und wia daun um ochte auf’d Noch in da Stockfinstan im sehr schwoch beleichtetn Botal auf amoi de Thais zam Schrein und Leichtn mit da Toschnlaumpn augfaungt haum, woas glei gescheit obenteiali a (im Nochhinein hot si aussagstöd, dass einfach an Tüpn vo an aundan Boot auf unsas valont haum).

Am next Dog woa’s Trio wida komplett und mia haum uns a boa aundare Insln augschaud. S’Weda woa haß, de sicht woa a vom Feinstn und mia haum a gscheide Freid g’hobt bam schnoachln in de Riffs und uns irrsinnig üwa de buntn Fischal und olle aundan Meeresbewohna gfreid. Wia im Kino – afoch nur sche.

[Show slideshow]